الرموز الوطنية المعنوية واجبة التوقير والاحترام، ويحظر ازدرائها وفقاٌ للقانون !!!

1 Comment

مادة في الدستور”الرموز الوطنية المعنوية واجبة التوقير والاحترام، ويحظر ازدرائها وفقاٌ للقانون”!!

يا ترى الخبر ده حقيقي ولا برضه الناس بيفتروا على اللجنة العبقرية اللي بيأسسوا الدستور؟ الدستور اللي مش عارفين عنه و هايطلع فجأه من العدم و هايتوافق عليه و نفضل نعاني منه 100 سنه قدام.

لو – و باقول لو علشان فيه ناس أصحابي بيزعلوا من الكلام ده و بيقولوا عليا بافتري على الاخوان و قيادات السلفيين – لو كان الكلام ده حقيقي يبقى سعادتك بتدي صلاحية فوق القانون للرئيس و عيلة الرئيس و رئيس الوزرا و كل الوزراء و رئيس مجلس الشعب و أعضاء مجلس الشعب و الشورى و المحافظين و قادة الجيش و كمان رئيس حزب الرئيس و الهيئة العليا في حزب الرئيس و ………..، و لو كان فيه طبقة أعلى من الحزب – زي ما حاليا فيه جماعة الإخوان فوق الحزب – يبقى كمان ضيف معاهم الرئوس الكبيرة في الجماعة و مكتب ارشاد الجماعه و مجلس شورى الجماعه و طبعا زي الحال في مصر كل اللي مرضي عليهم من كل الفئات سواء رجل أعمال مهم أو عالم واخد جايزة نوبل او حتى واحد الراجل الكبير بيرتاح في الكلام معاه، كوووووووووووووووووول الناس دوس اتحولوا بقدرة قادر في يوم و ليلة من ناس لرموز وطنيه واجبة التوقير و الاحترام و رجلك فوق رقبتك غصب عن عين اللي جابتك، و لو شتمتهم او انتقدتهم او قلت حاجه وحشه عليهم لا قدر الله فدول ملائكة مابيغلطوش و هاتخش السجن حدف او ممكن يهدروا دمك على حسب نوع النقد (الشتيمة) اللي سعادتك اتجرأت و قلتها.

احنا كده عمرنا ما هانتطور، ماشيين باقتدار في كتاب “كيف تصنع ديكتاتورا خطوة بخطوة”، و كمان شويه هانضيف قانون سب الذات الملكية … اقصد الرئاسة، على اساس ان الرئيس او بمعنى اصح الديكتاتور اللي لسه بيتولد مابيغلطش و انه فوق المسائلة و الحساب، مافيش حد فوق المسائلة يا حبيبي منك ليه، اللي غلط هايحاسب و حساب عسير كمان علشان مافيش مجال ان احنا يتجرب فينا تاني، كفاية اللي شوفناه طول 60 سنه حكم عسكري.

انا مرعوب من اللي مصر بتعمله، بنقلد السعوديه تقليد مهول لدرجة اني خايف يحولوها مملكة قريب!!

يا ترى انتي رايحة على فين يا مصر و واخدانا في ديلك

عجائب و غرائب السعوديه: أرقام العربيات

Leave a comment

أنا للأسف عندي هوايه سيئة شويه، اني باحب أتفرج على أرقام العربيات ، و بالذات بعد تركيب الحروف مع الأرقام الموضوع بقى أكبر و بيدي خيال أوسع في التخيل، المهم و انا باشوف أرقام العربيات في السعوديه – زي مصر بالضبط متقسمه جزئين حروف مع أرقام – و فيه بعض الأرقام بتبقى 3 حروف او أكتر أو أقل، لسه مش فاهم بالضبط التوزيعه ايه، المهم لما تبص على عربيه عليها الأرقام بالعربي و الانجليزي مع بعض هاتشوف حاجات غريبه، هاتشوف كل حرف عربي بيطابقه ايه انجليزي، فيه حروف منطقيه زي:
ن N

ط T

و حاجات زي كده، بس فيه حروف فعلا شاذه جدا مالهالش أي شبه العربي مع الانجليزي، بص مثلا على الحروف الجاية دي:

  • م –> Z
  • ح –> J
  • ق –> G
  • ص –> X
  • و –> U
  • ى –> V

 لو حد فهم ايه العلاقه بين الحروف العربي مع الحروف الانجليزي يبقى يفهمني

السعودية و العنصرية المضادة!!

Leave a comment

بعد القرار المفاجئ من شركتي بـ “ترحيلي” على فرع السعودية إعارة لمده عده أشهر، افتكرت أيام زمان لما كنت في السعوديه مع أهلي، و ازاي كان السعوديين بصفه عامه و الأطفال من سني – آن ذاك طبعا 🙂 – بصفة خاصه بيكرهوا االمصريين كره بشع، و اول ما كنا كان حد يعرف ان أنا مصري كانت المضايقات والتغليس يبدأوا، و فاكر ايامها كنت عامل  مع أصحابي المصريين في المدرسة عصابه مش شله علشان نصد بيها أي مضايقات على أي حد فينا، و كنا على طول مع بعض اهو منه صحبه و منه عزوة برضه.

المهم افتكرت كل الحاجات دي، و قلت يادي النيله، احنا هانرجع للأيام دي تاني، ربنا يستر بقى علشان أنا بقيت عصبي و مش هاسكت على أي حاجه تحصل حتى لو ايه اللي حصل، و المدير بتاعي قعد يديني الوصايا العشره قبل السفر بيومين، و كانت أهم وصيه خليك هادي ماتتعصبش لو حصل ايه قدامك، قلت أهلا، ابتدينا.

وصلت و استقريت و شوفت أول معامله غبيه من ضباط المطار، فقلت هما هما ما اتغيروش، ده احتمال يكونوا بقوا اسوأ كمان، المعم عدت الأيام و الأسابيع و بدأت أفهم شويه الدنيا ماشيه  ازاي، فوجئت من اللي بيحصل، السعوديين أقليه في الرياض!! الغالبيه العظمى في الشوارع  و العمال في المحلات هنود و باكستانيين و جنسيات تانيه كتير أغلبها من شرق آسيا، مع نسبه محترمه من المصريين و السوريين.

أول يوم السواق الهندي جيه خادني من المطار و كان قرفان مني جدا، تقريب كان مستني يشوف “واحد صديق” هندي زيه ولا حاجه. 🙂 … و قابل واحد فراش مش عارف جنسيته ايه بالضبط لقيته بيتعامل معاه بتعالي جدا!!!

و اللي لاحظته بشده ان الشرق آسيويين مابيستغنوش عن لغتهم بتاتا، بل أغلب السعوديين بقوا بيعرفوا يتكلموا هندي، و فيه كذا يافطه شوفتها مكتوبه بالعربي و الإنجليزي و الأوردي!!

وشوفت كمان منظر عجيب، شويه شباب مصريين ماشيين في الشارع، فضلوا يغلسوا على الشباب السعوديين اللي ماشيين في الشارع، و السعوديين ياعيني غلابه بيبعدوا عنهم او يسمعوا الكلام و الشتايم و يمشوا بسرعه علشان الموضوع مايتطورش!!!

طبعا ماباقولش ان السعوديين ملايكه يعني، بس شوفت حاجات عمري في حياتي ماتخيل اني هاشوفها من ناس أعرف انهم متكبرين بطبيعتهم.

و مش عارف ايه موضوع ثورة حنين اللي عايزين يعملوه ده، ده لو حد عمله هايبقى العمال اللي مش لاقيين حقوقهم او هايقوم بيها كل المتضررين من نظام الكفيل و ما أكثرهم، انما السعوديين نفسهم … بجد لا أعتقد!!!

%d bloggers like this: